មានហេតុផលអ្វីខ្លះ ចំពោះការទិញអចលនទ្រព្យ តាមការអូសទាញ ដោយមិនបានគិតពិចារណា?

    មិនមែនជារឿងងាយទេ ដែលបានចំណាយលុយរាប់ពាន់ទៅទិញអចលនទ្រព្យមួយកន្លែងដោយស្តាប់តាមការអូសទាញដោយមិនបានគិតពិចារណា។ គ្រប់គ្នាដឹងហើយថា ទម្រាំតែរកបានលុយបានមួយរយៗ មិនមែនជារឿងងាយស្រួលនោះទេ ដូច្នេះហើយ មុននឹងសម្រេចចិត្តទិញអចលនទ្រព្យនៅតំបន់ណាមួយ ដោយស្តាប់តាមការអូសទាញពីនរណាម្នាក់នោះ អ្នកត្រូវគិតឱ្យបានល្អិតល្អន់ថា តើវាផ្តល់ផលឱ្យអ្នកកម្រិតណា? បើគិតមិនដល់ចំណុចនេះទេ នោះនឹងធ្វើឱ្យអ្នកខាតបង់លុយ នឹងជួបប្រទះនូវហានិភ័យខ្ពស់ជាក់ជាមិនខាន។  

    នេះបើតាមការឱ្យដឹងពីលោក វង្ស ភក្តី ដែលជាសមាជិកនៅសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា និងជាស្ថាបនិកស្ថាប័នបណ្ដុះបណ្ដាល Home Business Research (https://www.facebook.com/homebusinessresearchofficail) បានបង្ហាញពីចំណុចខ្លះៗទៅការទិញអចលនទ្រព្យតាមការអូសទាញ ដោយមិនបានគិតពិចារណា ក្នុងនោះរួមមាន៖ 

១. អាចមានបញ្ហាផ្លូវច្បាប់ ព្រោះមិនបានសិក្សាឱ្យបានស៊ីជម្រៅ  

២. ទីតាំងមិនសូវល្អ ព្រោះជឿតាមអ្នកនាំ ដោយមិនបានចុះទៅមើលដោយខ្លួនឯង  

៣. ទិញទាំងបង្ខំ ឬ ក្រែងចិត្ត ជួបបញ្ហាសេដ្ឋកិច្ច បង្វិលលុយមិនទាន់ លក់វិញខាតក៏មាន  

៤. ម្ចាស់គម្រោង មិនមានបទពិសោធន៍ក្នុងការសាងសង់ គុណភាពមិនសូវល្អ  

៥. ជាប់បំណុលអាក្រក់ ពេលសម្រេចចិត្តលឿនតាមគ្នា ខ្ចីបុលគេមកទិញ  

៦. ទិញតាមគ្នា ដោយមិនមានជំនាញច្បាស់លាស់ ជាប់គាំងគម្រោងកណ្តាលទី ខាតពេល 

    ជាមួយគ្នានេះដែរ លោកក៍បានបញ្ជាក់ផងដែរថា៖ បញ្ហាខាងលើនេះ ភាគច្រើនគឺជាការអូសទាញឲ្យទិញពីអ្នកលក់ដែលគ្មានជំនាញច្បាស់លាស់ ឬពីមិត្តភក្តីដែលទើបផែចាប់ផ្តើម ប្រឡូកក្នុងវិស័យអចលនទ្រព្យ។

    គួរជម្រាបថា៖ មិនមែនរាល់ការទិញអចលនទ្រព្យតាមការអូសទាញទាំងអស់ សុទ្ធតែអាក្រក់នោះទេ។ ដូច្នេះប្រសិនបើបងប្អូន ចង់ទិញអចលនទ្រព្យណាមួយ ឬក៍ស្តាប់តាមការណែនាំពីនណាម្នាក់ឲ្យទៅទិញនូវគម្រោងណាមួយនោះ គឺទាមទារឲ្យបងប្អូនសិក្សាឲ្យបានច្បាស់លាស់ ទៅលើអ្នកណែនាំនោះ ក៍ដូចជាគម្រោងនោះឲ្យល្អិតល្អន់ជាមុនសិន ទើបទិញទៅទទួលបានផល និងជៀសវាងពីហានិភ័យផងដែរ។ ប្រភពព័ត៌មាន៖ Business Cambodia